15 سال پرانے گینگسٹر ایکٹ کے مقدمے میں مجرم قرار، عدالت نے دو سال قید کی سزا سنائی
- اغوا برائے تاوان اور خوف پھیلانے کے الزام میں قربان کو بڑا جھٹکا، 5 ہزار روپے جرمانہ بھی عائد
- دوسری جانب دیوبند پولیس نے موٹر سائیکل چور کو بھی گرفتار کر لیا
دیوبند: قانون کے ہاتھ لمبے ہوتے ہیں اور دیر سے ہی سہی، لیکن انصاف اپنا راستہ بنا ہی لیتا ہے۔ تقریباً 15 سال پرانے گینگسٹر ایکٹ کے ایک مقدمے میں عدالت نے ملزم قربان کو قصوروار قرار دیتے ہوئے دو سال قید اور 5 ہزار روپے جرمانے کی سزا سنائی ہے موصولہ معلومات کے مطابق یہ مقدمہ سال 2011 کا ہے۔ اس وقت دیوبند کوتوالی میں تعینات انسپکٹر راجندر سنگھ نے 31 اکتوبر 2011 کو ضلع شاملی کے تھانہ بھون علاقے کے رہائشی قربان کو اس کے ساتھیوں سمیت گرفتار کیا تھا۔
پولیس کے مطابق قربان پر گینگ بنا کر اغوا برائے تاوان جیسے جرائم انجام دینے اور عوام میں خوف و ہراس پھیلانے کے الزامات تھے۔ انہی الزامات کی بنیاد پر اس کے خلاف گینگسٹر ایکٹ کے تحت کارروائی کی گئی تھی۔ طویل عدالتی کارروائی کے بعد یہ مقدمہ سہارنپور کی ایڈیشنل ڈسٹرکٹ اینڈ سیشن جج (اے ڈی جے-05) کی عدالت میں زیر سماعت رہا۔ جمعرات کو عدالت نے تمام شواہد اور دلائل سننے کے بعد قربان کو قصوروار قرار دیتے ہوئے دو سال قید اور 5 ہزار روپے جرمانے کی سزا سنا دی۔ عدالتی فیصلے کے بعد علاقے میں یہ پیغام گیا ہے کہ سنگین جرائم میں ملوث افراد کو آخرکار قانون کا سامنا کرنا ہی پڑتا ہے۔
وِکاس نگر واقعہ پر مولانا محمود مدنی کا بڑا بیان، کہا: “بے گناہ شخص کا قتل انسانیت کے خلاف ہے
ادھر دیوبند پولیس نے ایک الگ کارروائی میں موٹر سائیکل چوری کے ایک شاطر ملزم کو گرفتار کیا ہے۔ پولیس کے مطابق گرفتار ملزم کی شناخت شینکی عرف سمر رانا ساکن رانکھنڈی کے طور پر ہوئی ہے۔ اسے گاڑیوں کی چیکنگ کے دوران رانکھنڈی روڈ پر نورپور کٹ کے قریب سے گرفتار کیا گیا۔ گرفتاری کے وقت اس کے قبضے سے چوری شدہ موٹر سائیکل کی نمبر پلیٹ برآمد ہوئی۔ پولیس کا کہنا ہے کہ ملزم کے خلاف دیوبند کوتوالی میں پہلے سے ہی گاڑی چوری کے تین مقدمات درج ہیں۔
کوتوالی انچارج کپل دیو کے مطابق ملزم سے مزید پوچھ گچھ کی جا رہی ہے اور امید ہے کہ اس سے گاڑی چوری کے دوسرے معاملات کے بارے میں بھی اہم معلومات حاصل ہوں گی۔ ایک طرف 15 سال پرانے گینگسٹر ایکٹ کے مقدمے میں عدالت کا فیصلہ سامنے آیا ہے، تو دوسری طرف دیوبند پولیس کی جانب سے موٹر سائیکل چور کی گرفتاری بھی جرائم کے خلاف جاری مہم کا حصہ ہے۔ مقامی لوگوں کا کہنا ہے کہ ایسے مقدمات میں مجرموں کو سزا اور پولیس کی بروقت کارروائی سے عوام کا قانون اور انصاف کے نظام پر اعتماد مزید مضبوط ہوتا ہے۔
