دیوبند کے ہائی وے پر آخر کیا چل رہا ہے؟ تعلیمی اداروں کے قریب بڑھتی مشکوک سرگرمیوں پر والدین میں تشویش، کارروائی کا مطالبہ
- تعلیم کی نگری دیوبند کی ساکھ پر سوال! ہائی وے کے کچھ ہوٹلوں کو لے کر عوام میں بحث تیز، انتظامیہ سے جانچ کی اپیل
- اسکولوں اور کالجوں کے قریب بگڑتا ماحول؟ عوام پوچھ رہی ہے، آخر ذمہ دار محکمے کب لیں گے نوٹس؟
دیوبند۔ ملک بھر میں اپنی تعلیمی، دینی اور ثقافتی شناخت کے لیے مشہور دیوبند میں ان دنوں ایک ایسا معاملہ زیرِ بحث ہے جس نے والدین، اساتذہ اور سماجی لوگوں کی تشویش بڑھا دی ہے۔ شہر سے گزرنے والے اسٹیٹ ہائی وے پر واقع کچھ ہوٹلوں اور ریسٹورنٹس کے بارے میں کافی عرصے سے مختلف قسم کی باتیں اور شکایات سامنے آ رہی ہیں۔ مقامی لوگوں کا کہنا ہے کہ بعض مقامات پر ایسی سرگرمیوں کی خبریں مل رہی ہیں جو علاقے کے تعلیمی اور سماجی ماحول پر منفی اثر ڈال سکتی ہیں۔ اگرچہ ان باتوں کی سرکاری طور پر تصدیق نہیں ہوئی ہے، لیکن عوام مطالبہ کر رہی ہے کہ معاملے کی غیر جانبدارانہ جانچ کرائی جائے۔
اس معاملے کو لے کر سب سے زیادہ فکر مند والدین ہیں، کیونکہ جن مقامات کو لے کر سوال اٹھ رہے ہیں ان کے آس پاس کئی اسکول، کالج، کوچنگ سینٹر، ہاسٹل اور اسپتال موجود ہیں۔ روزانہ ہزاروں طلبہ و طالبات اسی راستے سے گزرتے ہیں۔ والدین کا کہنا ہے کہ وہ اپنے بچوں کو بہتر تعلیم اور محفوظ ماحول کے لیے دیوبند بھیجتے ہیں، اس لیے ایسے معاملات کی مکمل جانچ ضروری ہے۔
دیوبند میں "سمپورن سمادھان دیوس" کے دوران 68 شکایات آئیں، صرف 5 کا حل؛ عوام کے سوال برقرار
مقامی شہریوں کا کہنا ہے کہ اگر کافی عرصے سے اس طرح کی باتیں سامنے آ رہی ہیں تو متعلقہ محکموں نے اب تک اس کی جانچ کیوں نہیں کی؟ لوگ یہ بھی سوال اٹھا رہے ہیں کہ نگرانی کرنے والے اداروں اور انٹیلی جنس محکموں کی نظر اس طرف کیوں نہیں گئی؟ کئی سماجی کارکنوں کا ماننا ہے کہ انتظامیہ کو وقتاً فوقتاً ایسے ہوٹلوں اور کاروباری مقامات کی جانچ کرنی چاہیے تاکہ کسی بھی غیر قانونی سرگرمی کو روکا جا سکے۔
شہر کے معززین اور سماجی تنظیموں کا کہنا ہے کہ افواہوں اور قیاس آرائیوں کے بجائے انتظامیہ کو حقائق سامنے لانے چاہئیں۔ اگر جانچ میں کوئی بے ضابطگی یا غیر قانونی کام ثابت ہوتا ہے تو ذمہ دار افراد کے خلاف سخت کارروائی ہونی چاہیے۔ اور اگر الزامات غلط ثابت ہوں تو انتظامیہ کو عوام کے سامنے حقیقت رکھ کر شکوک و شبہات کو بھی دور کرنا چاہیے۔
دیوبند کے لوگوں کی نظریں اب ضلع انتظامیہ اور پولیس کے اعلیٰ افسران پر ٹکی ہوئی ہیں۔ عوام کو امید ہے کہ شہر کی ساکھ، طلبہ کے مستقبل اور سماجی ماحول کو مدنظر رکھتے ہوئے اس معاملے پر سنجیدگی سے غور کیا جائے گا۔ دیوبند ہمیشہ سے علم، تہذیب اور اچھے ماحول کی پہچان رہا ہے۔ اسی لیے شہری چاہتے ہیں کہ شہر کی اس شناخت کو برقرار رکھنے کے لیے ہر ضروری قدم اٹھایا جائے۔
رپورٹ: دین رضا
