رالود کا بڑا فیصلہ! یوگیش پرتاپ سنگھ گجر بنے کھیل سیل کے قومی سکریٹری
- دیوبند کے یوگیش پرتاپ سنگھ کو ملی بڑی ذمہ داری، جینت چودھری کے کھیلوں کے وژن کو آگے بڑھائیں گے
- سہارنپور میں رالود کو ملی نئی طاقت، کئی رہنماؤں نے بھی پارٹی میں شمولیت اختیار کی
سہارنپور/دیوبند۔ مغربی اتر پردیش کی سیاست اور کھیلوں کی دنیا سے ایک اہم خبر سامنے آئی ہے۔ راشٹریہ لوک دل (رالود) نے دیوبند کے معروف سماجی کارکن اور شوٹنگ اکیڈمی چلانے والے یوگیش پرتاپ سنگھ گجر کو کھیل سیل کا قومی سکریٹری مقرر کیا ہے۔ یہ اعلان سہارنپور کے حقیقت نگر واقع رالود کے کیمپ دفتر میں منعقد ایک پروگرام کے دوران کیا گیا۔ کھیل سیل کے قومی صدر چودھری نیرپال سنگھ نے یوگیش پرتاپ سنگھ کو نئی ذمہ داری سونپتے ہوئے مبارکباد دی۔
اجلاس سے خطاب کرتے ہوئے چودھری نیرپال سنگھ نے کہا کہ رالود نوجوانوں اور کھلاڑیوں کو آگے بڑھانے کے لیے مسلسل کام کر رہی ہے۔ انہوں نے کہا کہ پارٹی کے قومی صدر اور مرکزی وزیر جینت چودھری کھیلوں کو فروغ دینے کے لیے خصوصی دلچسپی رکھتے ہیں اور کھلاڑیوں کی حوصلہ افزائی کے لیے ہر ممکن کوشش کرتے ہیں۔ انہوں نے کہا کہ کھیل صرف تفریح کا ذریعہ نہیں بلکہ نوجوانوں کے بہتر مستقبل اور اچھی شخصیت سازی کا اہم ذریعہ بھی ہیں۔
قومی سکریٹری بنائے جانے پر یوگیش پرتاپ سنگھ گجر نے پارٹی قیادت کا شکریہ ادا کیا۔ انہوں نے کہا کہ پارٹی نے ان پر جو بھروسہ کیا ہے، وہ اسے پوری ایمانداری اور محنت کے ساتھ نبھائیں گے۔ انہوں نے کہا کہ ان کی کوشش ہوگی کہ زیادہ سے زیادہ نوجوان کھیلوں سے جڑیں اور اپنی صلاحیتوں کو نکھار سکیں۔
کھیڑا مغل علاقے میں چوروں کا قہر، ایک ہی رات میں چھ ٹیوب ویلوں سے اسٹارٹر اور کیبل چوری
پروگرام کے دوران مختلف سیاسی جماعتوں سے وابستہ کئی رہنماؤں اور کارکنوں نے بھی رالود میں شمولیت اختیار کی۔ چودھری نیرپال سنگھ نے انہیں پارٹی کا پٹکا پہنا کر استقبال کیا رالود میں شامل ہونے والوں میں سچن شرما، دلنواز، پروین دھون، رشی پال سنگھ اور ان کے متعدد ساتھی شامل رہے۔
اس موقع پر اروند ملک، چودھری نریندر سنگھ گجر، چودھری سشیل گجر، راہل سنگھ گجر، چودھری دیپک سنگھ گجر، چودھری جے کمار اور ٹونی سنگھ سمیت بڑی تعداد میں پارٹی کارکن اور عہدیداران موجود رہے۔ سیاسی حلقوں کا ماننا ہے کہ یوگیش پرتاپ سنگھ گجر کو قومی سطح کی ذمہ داری ملنے سے دیوبند اور سہارنپور میں رالود کو مزید مضبوطی مل سکتی ہے۔
